Shtëpia e kulturës në Negotinë është e vetmja në Komunën e Vrapçishtit. Ajo funksionon me një staf të vogël me gjithsej katër të punësuar dhe ballafaqohet me mungesë të mjeteve financiare. Ky problem, që ka qenë gjithmonë i pranishëm, bëhet më i shprehur dy viteve të fundit, kur shtëpitë e kulturës në vendet rurale kaluan në kompetencën e komunave.
Shtëpia e kulturës në Negotinë edhe pse nuk shquhet për aktivitete të begata dhe përballet me probleme financiare, megjithatë nuk mund të thuhet se nuk funksionon fare. Ky institucion mban gjallë shoqëritë kulturoreartistike dhe në të herë pas here organizohen aktivitete të ndryshme kulturore dhe edukativoarsimore.
"Para disa javësh në këtë shtëpi u shfaq premiera e filmit "Koha e kometës", i cili është një ndër filmat më të suksesshëm dhe më të shtrenjtë shqiptarë", njofton Nuredin Jashari, drejtor i shtëpisë së kulturës në Negotinë. Sipas tij, më herët në Negotinë janë shfaqur më shumë filma, por me paraqitjen e teknologjisë së re, jo vetëm në mjediset rurale, por edhe nëpër vendbanimet urbane ka rënë interesimi për kinematë. Mjediset e shtëpisë së kulturës i shfrytëzon SHKA "Sami Zendeli" nga fshati Negotinë, shoqëri kjo e cila ka marrë pjesë dhe është paraqitur me sukses në më shumë festivale folklorike dhe popullore. Në këtë pallat janë promovuar libra të autorëve lokalë si dhe rregullisht organizohen kuize të diturisë nga ana e nxënësve të gjimnazit në paralelet e ndara në Negotinë. "Por jo vetëm për aktivitete kulturore, pallati i kulturës është shfrytëzuar edhe për realizimin e seminareve të ndryshme edukativoarsimore", nënvizon drejtori Arsllani.
Shtëpia e kulturës në Negotinë është e vetmja në Komunën e Vrapçishtit.
Ajo funksionon me një staf të vogël me gjithsej katër të punësuar dhe ballafaqohet me mungesë të mjeteve financiare. Ky problem, që ka qenë gjithmonë i pranishëm, bëhet më i shprehur dy viteve të fundit, kur shtëpitë e kulturës në vendet rurale kaluan në kompetencën e komunave. "Ne si shtëpi kulture, vetëm pagat mujore i marrim nga Ministria e Kulturës, ndërsa për harxhimet e tjera financohemi nga Komuna e Vrapçishtit. Megjithatë, mundësitë e komunës janë shumë të kufizuara", thotë drejtori Jashari. Shtëpia e kulturës në Negotinë ekziston prej 30 vitesh dhe deri më tani nuk është bërë asnjë riparim më i madh. Vitin e kaluar është intervenuar në çatinë e objektit, te pjesa mbi sallën e madhe.
"Ishte ky një intervenim i domosdoshëm, i cili u bë me mjetet e komunës. Mirëpo duhet bërë shumë më tepër. Pikësëpari skena nuk i plotëson kushtet për prezantim të ndonjë shoqërie kulturoroartistike më të madhe, ose të ndonjë trupe teatrore. Ajo është e vogël, ndërsa dërrasat, 30 vjet të vjetra, tanimë janë kalbur", potencon Nuredin Jashari.